烚粟米唔好過5分鐘 冷河沖洗鎖住香甜

外國媒體分享，烚粟米要保留天然甜味與爽脆口感，關鍵在於烚煮不超過5分鐘，並撈起後立即以凍水沖洗，中斷餘溫繼續煮熟。食品作家Sara Bir亦提醒，選購新鮮粟米時，外層葉要留到煮前才剝，並盡快放入雪櫃保存。

記者：陳嘉明， 總編輯

2026年8月18日 12:00 · 全文 515 字

愛吃烚粟米，但每次煮完都又腍又淡味？有外國媒體分享，要保留粟米的天然甜味與爽脆口感，烚煮時間其實不宜超過5分鐘，撈起後更要用凍水馬上沖洗，先可以鎖住每粒粟米的鮮甜多汁。

外國媒體Simply Recipes指出，不少人煮粟米時不自覺烚得過火，破壞了天然風味。理想嘅甜粟米應該保留少少爽脆口感，咬落去粒粒都夠彈牙。食品作家Sara Bir就分享了一個簡單秘訣，令次次煮出嚟嘅粟米都飽滿香甜。

首先，烚粟米時間要控制喺4至5分鐘以內，建議用計時器，唔使擔心唔熟。不過呢個黃金法則最啱用喺新鮮剛摘嘅粟米；如果已經擺放咗一個星期或以上，粟米可能流失水份變硬，需要稍為延長烹煮時間。

其次，烚完5分鐘或更短時間後，要即刻將粟米撈起，用冷水沖洗，等佢停止繼續被餘溫煮熟。同烚西蘭花後浸冰水唔同，只要將粟米放喺筲箕，喺水龍頭下用冷水簡單沖一沖就得。呢個步驟係鎖住粟米香甜爽脆口感嘅關鍵。

想保持粟米飽滿多汁，仲有以下貼士：烚煮唔好超過4至5分鐘；天氣太熱唔想廚房升溫，可以改用微波爐加熱；新鮮粟米買返嚟之後，外層葉要留到煮前先剝，不過可以預先撕走外露、濕咗嘅啡色粟米鬚；為保留天然甜味，買完粟米要盡快放入雪櫃，如果雪櫃唔夠位，放入冰凍保溫箱都係好選擇。

陳嘉明

總編輯

統籌港聞及政府政策報道，主理本網每日的頭條取捨與發稿標準。